Пре нєподполне и нєдоповедзене обвисцованє у медийох зоз схадзки Националного совиту, котра отримана 23.10.2010. року у Руским Керестуре, Руска матка чувствує потребу и обовязку спрам своїх членох и явносцу же би пояшнєла яки ше то "идеолоґийни розиходзеня" случели помедзи Рускей матки и Союза Руснацох Українцох на схадзки Националного совиту.

На схдзки Националного совиту єдна з точкох дньового шора бул предклад контракту о медзиреґионалним сотруднїцтве АП Войводини и Закарпатскей обласци України. У началє, Руска матка нєма нїч процив сотруднїцтва зоз Закарпатску обласцу, гоч там Русини нє припознати як окремни народ алє як часц – субетнос українского народа.

Поставя ше питанє, чи би нє було логичнєйше подписац таки контракт о сотруднїцтве перше зоз реґионами дзе Руснаци припознати а то, поведзме, Словацка, Польска, Мадярска а вец и зоз Закарпатску обласцу України бо и там єст Русинох (и то вельо вецей як цо то українски власци указую).

У спомнутим предлкаду контракту о реґионалним сотруднїцтве зоз Закарпатску обласц України стої же у Закарпатю жиє дацо вецей од 10000 Русинох. Проблем у тим же и тоти 10000 уписани як подґрупа у рубрики Українєц цо очевисно гутори же українски власци нємаю намиру припознац же Русини окремни народ.

Якей вец лоґики єст у даваню предкладу же би ше подписал контракт лєм зоз Закарпатску обласцу України а занєдзбовац реґиони дзе Русини припознати и маю шицки права як окремна национална меншина?

Дахто би могол заключиц же за предкладаньом такого контракту стоя даяки особни интереси або интереси єдней ґрупи.

Ми нє знаме чи то так чи нє алє шицко то барз здабе на предлужованє политики котру єдна ґрупа водзела 1967. року у Войводини (писмо 159 потписнїкох) а здабе и на предлужованє роботи по Плану мирох за ришованє проблему Українцох Русинох котри 1996. року видало Министерство за Дияспору України и розпослало до шицких жемох дзе жию Руснаци.

Ми контакти и сотруднїцтво з Русинами у швеце маме и тераз алє правда же тоти, терашнї, контакти и сотруднїцтво на нїзшим уровню як цо би то було з подписованьом єдного контракту на уровню А.П. Войводини и реґионох у начишлєних державох.

У даскелїх виступох предсидатель Националного совиту Руснацох Славко Рац виявйовал же нас премало єст же би ше дзелєли. Ми то потримуєме та ше пре то намагаме же би Руснаци остали Руснаци и же би зме преширели сотруднїцтво на шицки держави дзе жию Руснаци (припознати або нє).

Пре шицко тото, предклад же би ше направел контракт у котрим би були облапени шицки держави дзе жию Русини, а нє лєм єден реґион, дал член Националного совиту, предсидатель Рускей матки и предсидатель шветовей Ради Русинох/Руснакох/Лемкох пан Дюра Папуґа. Зоз тим предкладом зложела ше векшина членох Националного совиту та пре то приношенє одлуки преложене за шлїдуюцу схадзку по котру би требал буц направени други предклад.

потрпарол Рускей матки

Мирослав Силадї