САМАРА (РУСИЯ), 18. децембер 2010. (Рутенпрес) - На Державней социялно-гуманистичней академиї у Самари, у Русиї, стреду, 15. децембра, отримана Рочна науково-практична конференция з назву "Образованє, релиґия, особа”.

На конференциї обробени теми "Искуство и перспектива сотруднїцтва медзи державу и вирскима орґанизациями у образованю", "Значносц релиґиозних вредносцох у формованю и моцнєню физичного и психичного здравя особи" и "Теория и пракса медзисобного дїйства нових релиґиозних рухох на дружтво и державу".

На конференциї, прейґ видео-линку, наступел и млади науковец з Ростова на Дону Ґриґорий Миронов, з роботу з назву "Уплїв конфесийней припадносци на националну идентификацию Руснацох у Войводини”.

Тема о Руснацох виволала интересованє, а єдно з питаньох ше одношело на зєдиньованє шицких Руснацох/Русинох. Було виражене и думанє же Русини подзелєни на штири ґрупи, котри ше ориєнтую на Українцох, Русох, Словацох и Мадярох. Пан Миронов виявел же єст пейц русински ґрупи, и же найчисленша тота у котрей ше Русини ориєнтую сами на себе.